Ыстанбұлдың тарихи аудандарының бірі – Зейтінбурну тек ежелгі жәдігерлерімен ғана емес, біздің қандастарымыз үшін де қасиетті мекен саналады. Мәрмәр теңізінің жағасындағы бұл аймақ – өткен ғасырдың ортасында Түркияға қоныс аударған қазақтардың алғашқы панасы болған «Зейтінбурну қазақтары» деген атпен танымал қауымның қара шаңырағы. Сондықтан бұл жерге келу – бір жағынан антикалық дәуірді таныса, екінші жағынан бауырлас халықтың тарихына үңілу деген сөз.
Музейдің орны да ерекше. 2015 жылы бұрынғы әскери госпиталь ғимаратын (қазіргі Казлычешме өнер орталығы) қалпына келтіру кезінде 1,5 метр тереңдіктен таңғажайып мозаикалар табылды. Б.з. IV–V ғасырларына, яғни кеш Рим және ерте Византия дәуіріне тиесілі бұл өрнектер кезінде зәулім Рим вилласының сәні болған.
Музейде не көруге болады?
Мұнда келушілерге ыңғайлы болу үшін арнайы шыны еден орнатылған. Сіз аяғыңыздың астындағы 190 шаршы метрлік алып мозаиканы – геометриялық пішіндерді, жұлдыздар мен гүл өрнектерін жоғарыдан тамашалай аласыз.
Археологиялық олжалар тек тас өрнектермен шектелмейді:
-
Мәрмәр саркофаг: Ішінен екі адамның сүйегі табылған көне қабір.
-
Тұрмыстық жәдігерлер: Әр дәуірден қалған терракота ыдыстар мен тиындар.
Бүгінде бұл орталық тек музей емес, заманауи кітапханасы мен көрме залдары бар мәдени хабқа айналған.
Түркияға сапарыңыз кезінде тарихтың сан қатпарын сезініп, Ыстанбұлдағы қазақ ізімен танысқыңыз келсе, міндетті түрде соғуыңыз қажет музейлердің бірі – дәл осы Зейтінбурнуда орналасқан.
